Wala sana akong balak gumawa ng birthday post pero dahil sa natanggap kong email from Ma'am Teks ay na inspired akong gumawa ng entry. Thanks ma'am for this one:



Dalawang birthday ko lang naman ang naging memorable sa akin. Isang malungkot at isang masaya.

Lahat naman siguro ng babae ay nangarap na magkaroon ng magandang birthday party pagdating sa edad na 18. Bilang panganay na babae ako pa lang ang unang mag dedebut sa pamilya. Kahit hirap ang buhay namin noon ay pinaghandaan ng nanay ko ang pagdating ng birthday ko. At the same time excited rin ako at nasabihan ko na nga lahat ng friends ko. But a week before my birthday ay namatay ang father ko. Isang napakalungkot na pabirthday at pasko para sa aming lahat. Matagal din bago kami naka recover lahat sa biglaang pagkawala ng isang mahal sa buhay.

Ang isang birthday ko naman na naging memorable din sa akin ay noong first birthday ko as misis ni kd. Hindi sabay ang oras ng pasok namin sa office noon kaya mas una syang umaalis sa akin. Pagtunog ng alarm clock sa side table ay may nakita akong birthday card sa mismong tabi ng clock. Syempre napangiti ako dahil yun ang unang nakita ko pagmulat ng mata ko di ba? Deretso na ako sa bathroom para maligo at pagkapa ko ng switch ay meron na namang birthday card na nakadikit. Pagkuha ko ng toothbrush ay meron ulit card sa may lalagyan ng toothpaste. Pagpasok ko sa room para nag-ayos ay meron ulit card nakaipit sa may salamin ng tokador, alam na alam ang daily routine ko. Naghanap pa ako ng iba dahil baka doon nakalagay sa huling card yung diamond pero wala na pala…hehehe.

Pagsundo nya sa akin sa office noong hapon ay nag celebrate na lang kami sa labas. Napakasimpleng birthday pero para sa akin ay napaka memorable dahil siguro alam ko na kahit papaano ay pinag-aksayahan ng isip para maging masaya ako sa araw ng kaarawan ko.

This year, may selebrasyon dito sa bahay pero para naman kay Tin2 dahil birthday din nya sa December 21. Kung noong bata pa sya ay ako ang mapilit na ipaghanda sya , ngayon sya na yung nagsasabi na ipaghanda sya dahil marami raw syang invited na friends.